هو إنتي مين

لا أعتقد أن لقصور ما في شخصيتي أول لشئ من هذا القبيل قررت إني مخرجش مع ناس تافهه تاني مجموعة من الصديقات المثليات والذي اعتقدت ان تلك هي الحياه التي يجب ان أعيشها لأن محدش غيرهم هيبقي عارف أني مثلية و و و وأسباب أعدها لنفسي

ولكن عقلي وطبيعتي لم ينسجما معهن لأنه أصبح من المرهق جداً إنك تفضل طول الوقت تتكلم في موضوع ساذج وتافه وسطحي للغاية

إلي جانب أكثر ما يثير حنقي وهو إلقاء الأحكام والانتقاد هو انت او انتي مين علشان تلقي احكام علي الناس كل واحد متعرفش هو بيعمل كده ليه اوي بيقول كده ليه او لابس ليه كده الا ان الموضوع زاد وزاد معاه ضغطي وتمنيت في احدي المرات وانا امامي فاه مفتوح برغي عن الناس ان تبتلعها الارض حتي ينخفض ضغطي

اميل الي التحدث عن نفسي او اذا تحدثت عن شخص اخر فابتعد عن كوني قاضي ويصنف نوع هذا الانسان علي الاقل بحتفظ برأي في الانسان ده لنفسي فقط ومفيش داعي للتجريح فيه بس للاسف احنا في مجتمع لا يملك سوا التريقه وبس وبيقولوا الشعب المصري دمه خفيف بصراحه هو ده خفيف في قله الادب بيضحك علي نفسه وعلي غيره الغريب انك تلاقي اللي عمال بينتقد ده اوي ممكن اطلع في عيوب الدنيا كله منه لكن اقول ايه يكفيني ان استمر بما اقتنع ولأضع لساني في فمي وان نطق فلينطق خيرا

من بريك العمل اتحدث وهرجعله تاني عندي شغل كتير اوي النهارده

:)

أفتقدك صديقي

في فترة من حياتي كان لي صديق مثلي خالد تعرفنا عن طريق صديق ثالت خالد كان جزأ أساسي في حياتي كنا بنتشارك في كل شئ

كان قريب جداً لقلبي حسيت أنا وهو إننا جزئين بنكمل بعض وبنحب وبنخاف علي بعض من غير أي مصلحة لا هو مستني من حاجه ولا أنا يمكن هو الوحيد اللي أنا بقول عليه صديق لكن من البنات المثليات أبدا دايما بتبقي علاقة فاشلة كصداقة البنات احيانا بيبقي ليها حركات نص كم وكلام ورغي كتير ودي قالت ودي عادت وانا مبحبش الجو ده لأنه بيثير أعصابي جدا ,انا وهو فعلا أصدقاء بمعني الكلمة من قبل ما اكون محتجاله كنت بلاقيه رابط غريب إحساسي بيه كان اخ واب وابن في نفس الوقت وهو كان بيهتم بادق تفاصيل حياتي ..دلوقتي افتقد وجود خالد في حياتي اوي سافر للعمل بالخارج ووقتما تسنح الظروف بنتكلم لكن للاسف لانشغالي انا ايضا وانشغاله بتكون معجزه اننا نتقابل اونلاين الغريب اني لما كنت بحكي لاي صديقه مثلية برده عنه كان بتستغرب جدا وكتير من المثليات علي فكره مش متقبلين الولاد المثليين ودي حاجه مش قادره افهمها نهائي لحد النهاردة طب ما انتي نفسك كده

إزاي نبقي بنفكر بعنصرية وعايزين الناس متتعاملش معانا بنفس اسلوبنا كل واحد حر يختار الحياه اللي تريحه

من هنا لقيت ان ناس كتير بتحلل لنفسها اشياء وتحرمها علي الأخرين بدون سببه وجيه لذلك وعلي فكرة دي بتبقي بذره لمشكله في علاقات ناس كتير مع بعض انا اعمل انت متعملش او يعمل المصيبه من دول ومش عايز الانسان اللي مرتبط بيه يعمل زيه

او حتي يكون في مجال لنقاشها

الاسلوب الديكتاتوري بيولد الانفجار في وقت يمكن متعرفش تسيطر علي الانفجار ده

حطيت الأغنيه اللي علي الجنب فوق دي كانت أغنيتنا المفضلة

تستمر

كنت أصاب بحالات يأس و إحباط شديدة بعد إنهاء علاقة فشلت أو فشل في أي مجال تاني كانت أي كلمة جارحة من أي شخص تأثر بي وكفيلة بإني أكتئب لكن مرور الوقت إتعلمت أن الحياة بتستمر وعمرها ما بتقف علي شخص بيبقي صعب أني أصدق الكلام وقت ما بكون محبطة لكن لما بدي لنفسي مساحة للتفكير والهدوء العقلي والنفسي بوصل ان الحياة مخلوقة ليا علشان اعيشها مش علشان اعمل شات داون

لحياتي فيها .... روبرت فروست قال

يمكنني أن ألخص كل ما تعلمته عن الحياة في كلمتين: أنها تستمر

النفس البشرية مخلوقة بطريقة غاية في الإبداع ممكن يطلع منها طاقة تبني عالم جديد هي هي نفسها اللي ممكن تهد عالم بأكمله

توفيق الحكيم كان قال لا يوجد إنسان ضعيف، ولكن يوجد إنسان يجهل في نفسه موطن القوة وعادي لو قابلتنا صعوبات الحاجات السيئه دايما بتبقي سهلة الضعف سهل التخاذل سهل الكسل ..إلخ اللي محتاج مثابرة بيتجني حصاد مثابرتك ليه في الآخر كلامي ده مش عظة لحد

لكن بيدفعني انا شخصياً ولأن الكتابة صديق وفي جداً

اللي جاي

كأي شخص ببدأ حياتي المهنية وعايزه أكبر في الكرير اللي إخترته لحياتي عندي أحلام كتير هحققها إن شاء الله و بفكر من زمان إني أستقل بشقة ليا ومن رأيي إن كل بنت لازم تعتمد علي نفسها وعلي فلوسها الشخصية ومتخليش رقبتها تحت رحمة أي إنسان

مؤمنة جداً أن من يملك الإقتصاد يملك القوة

كتير بشوف حالات لسيدات بيتهانوا يوميا وباقين مع أزواج بس علشان بيصرف عليها وعلي البيت والولاد والعيشة واللي عايشنها

وده شئ بيثير اشمئزازي جدا وبحترم جداً أي سيدة بتعتمد علي نفسها وناجحة في شغلها وفي استمرار لإثبات جدارتها في أي مجال

بالنسبه ليا دي قدوة السيدات اللي من النوع ده بتديني حافز ودافع وعامل مشجع كبير إني أكون و أكون كما خططت لنفسي

ومش السيدات بس كل قصص نجاحات رجال الأعمال بتلفت انتباهي جداً مفيد أوي إنك تتعلم من ناس خصوصا اللي بدأوا من الصفر وتحت الصفر أحيانا يمكن إن شاء الله في البلوج أعرض بعض قصص النجاح دي مرتاحة أوي من وقت ما فتحت البلوج ده ومتفائلة بيه وهعتبرة أجندة اسجل وارصد وأحكي واغني كمان فيها كل حاجة وأناقش كمان وجهات نظري وأسمع لناس تانية

بداية

قررت بعد تفكير أني أفتح المدونة دي مش بس علشان تكون مجرد مدونة مثلية والسلام لكن عايزة أنا كمان أبدا فيها من جديد أحكي فيها حاجات مضيقاني ومفرحاني وأتكلم عن هويتي كبنت مصرية مثلية في وقت إلي حد كبير المثلية فيه مبقتش حاجة غريبة علي مسامع الناس

أنا شايفة أن المدونات فرصة حلوة أوي إن الإنسان يفرغ فيها صراعاته وأحلامه مكان بتفكر فيه بصوت عالي وبتصرخ برضه بصوت عالي وفي ناس بتشاركك وأنا مستعدة لكتير من محبي الشتائم وأصحاب الوعظ المستمر لكن مش بيهمني اللي يتكلم يتكلم

واللي عايز يقول حاجه يقولها بعلو صوته وليا حق الرد أو عدم الرد